2018-01-27

【蘋果日報】馮睎乾:令香港人蒙羞 (912)

《誤人子弟》截圖

我身為一名奉公守法、彬彬有禮、道德水平甚高的深藍絲,當然時刻關注藍絲網頁。前天,他們上載了一段電台節目環節,有位林太打電話給主持,力數浸大學生不是。果然高手在民間,林太滔滔不絕,字字鏗鏘,更運用排比、層遞等修辭技巧,簡直像寫了講稿,再透過電台廣播,很有成為邱吉爾2.0的潛質。林太講詞如下:
「竟然為咗個豁免試,去教職員度講粗口、羞辱老師,我睇到呢段短片嘅震驚同失望,一定大過劉同學(註:指涉事的學生會會長)。我亦都明白點解老師會喊,因為佢哋好傷心、好痛心、好震驚,一個大學生,過咗十八歲,竟然仲可以咁樣講出嚟,話係口誤(註:學生會會長辯稱爆粗是「口誤」),佢哋唔單只令浸會大學蒙羞,更加令香港所有大學生都蒙羞。希望佢哋反省吓,作為一個學生,成年人,大學生,係咪可以咁唔尊師重道囉。」
我期望林太會打電話到電台,以同樣熱血的腔調,發表以下演說:
「竟然為咗嗰幾百呎去僭建,知法犯法,我睇到呢啲新聞嘅震驚同失望,一定大過習近平。我真係好傷心、好痛心、好震驚,一個律政司司長,差唔多六十歲,竟然仲可以咁樣講出嚟,話自己太忙,話『我唔接受我係個冇誠信嘅人』,而特首仲可以叫人包容,佢哋唔單只令政府蒙羞,更加令香港所有人蒙羞,甚至令全中國人蒙羞。希望佢哋反省吓,作為一個高官,成年人,領導者,係咪可以咁唔守法囉。」
當然,即使林太真的這樣說,藍絲網頁也不會分享。但林太的口才,啟發我想通一個問題:學生該如何抗爭,才不會被罰停學呢?
既然大學把學生當成中、小學生來教,那麼大學生的家長,也應該把大學當成中、小學才對。上一代的社會賢達說得對,大學生水平每況愈下,慘不忍睹,例如港島區那位參選立法會補選的陳家珮女士,外國大學畢業,依然講不出一句像樣的英文,可見大學生水平低落是普世現象,不但令全地球人蒙羞,簡直令靈長類動物,不,令所有哺乳類動物蒙羞。如何是好?當然要靠上一代的賢者出手,挽狂瀾於既倒,扶大廈之將傾。
我鄭重建議,本地各大學當領先全球,從速設立家長教師會,學生會不妨解散,或只負責搞派對和宿營。大學政策如有不善,概由仁、義、禮、智、勇兼備的家長出面,直接與校方交涉。如果有家教會,這次浸大事件就會這樣發展:家長們在Baby Kingdom炮轟浸大,同仇敵愾,決定同一天到語文中心投訴──留意關鍵字是「投訴」,非「佔領」。投訴情況在網上熱播,林太激動地說:「Miss,我真係好傷心、好痛心、好震驚,點解我個仔主修英文,都要普通話合格先畢業?」李太搶白:「你哋老師點教書㗎?教到咁多人唔合格?」(下刪一億字)
在師奶面前,所有高牆都會變成雞蛋。



原文連結



0 comments:

Post a Comment