2018-01-11

【香港01】陸小菲:狂Loop霆鋒彈結他,不如睇黎明搭地鐵 (3068)

01博評-藝.文化

最近小菲的臉書被各大樂壇頒獎禮洗版。先有謝霆鋒喺叱吒的暖場騷成為大家的前菜,表現畀你睇上一代點樣 chok 住同今代 rock 住對對碰 mix and match,用嗰份非一般出色的自信喺舞台上 tune 返 down 少少自己個真實年齡。當你想睇下 Chef Le Mon 今次係咪單線 solo 嘅時候,成班結他手企出嚟左右掩護「結他之神」,真係勁到連 cam man 都企唔穩,連人帶機碌落台,嗰下你就知 Chef Le Mon 武功實在高強。

叱咤樂壇頒獎禮謝霆鋒矚目演出(網上圖片)

主菜有陳奕迅同林海峰的讀白穿插金曲,勾起全香港人的美好回憶。Eason 抵讚嘅係今次做足功課,一洗屢次甩嘴、忘詞的過去。林海峰的讀白呢?無論讀白內容係咪來來去去都係嗰三篤屁都好啦,人生咪又係來來去去都係嗰三篤屁;所以你拎住啲會燒得盡的青春去戇居就啱㗎喇,到時剩返啲戇居就唔會去計算到底青春唔青春。

陳奕迅叱咤樂壇頒獎禮串燒金曲表演(資料圖片)

甜品有香港電台樂壇頒獎禮裏面郭富城大跳特跳七分鐘,又唱又跳,氣場之大,保養之好,一場華麗的表演在 social media 洗版無限 loop,大叫王者為王,贏足點擊率。黃心穎果啲真係可以留返結婚嗰日宴客先拎出嚟,大日子個個畀面掌聲都大力啲。

郭富城於《十大中文金曲頒獎禮》連跳連唱8分鐘(資料圖片)

講咗咁耐,到頭來咪又係講緊香港人回味緊自己最光輝的歲月。當哥哥、梅姐、羅記都走晒嘅時候,諗緊邊個可以將美好年代重現眼前嘅時候發現星味無窮都可以套喺自己經歷過的E神同舞王城城身上,真係 feeling thankful 到超出感恩可以形容。

佳餚通通都有了,咁美酒呢?

小菲會話係黎明。

係,係明福俠。

當 Chef Le Mon(做咩都好似係宇宙最勁咁)做出一場場比實力高強的表演,將自己神化出新高度的時候,小菲發現明福俠嗰份 down to earth 真係扮都扮唔嚟。猶記得兩年前演唱會塊布因為過唔到消防嗰關,明福俠自己企出嚟同大家交待事件。唔開咩記者會,唔使咩 PR 出新聞稿,唔搞呢樣唔搞嗰樣,直接企出嚟拎個 cam 對住自己在會場即錄。好 man!

【廖詩颺:在這迷信公關的年代,黎明是一股清泉】

【噗先生:黎明轉危為機 多得Facebook兩大優勢】

【張景宜:黎明回應快精準 公關操作最佳示範】

小菲覺得如果 E 神同舞王城城帶住的係明星的光環,畀你台上的美好回憶。明福俠就係喺你身邊教你應該點去做人,重會以身作則示範埋畀你睇;有啲似發哥。我地除咗一啲要去崇拜的偶像,都需要一啲令我地去做個 better person 的領袖。

日前明福俠喺襄陽因為大雪無飛機,飛唔到去上海開騷;如果遇到呢啲情況好多時候,嗰啲耍大牌的明星姐仔通常都會選擇在社交媒體同粉絲們道個歉,然後就將個鑊交俾公關去處理。但明福俠的處理方法呢?

明福俠選擇經南京去上海,展開一場超過 1,000 公里的路程趕過去,事後更以「經歷分享,點都去到!」為題將自己的一場公路之旅變成短片上載到 Facebook。可以睇到嘅係明福俠戴住個黑口罩響襄陽車站買咗張二等車飛去南京,其後動車因為大雪由 7 個鐘變 9 個鐘,到咗南京又因為動車 delay 而重新再買高鐵飛。細心的明福俠因為預算到 8 點前由蒲西到蒲東一定會塞車所以改搭地鐵去表演場地,一共花費 12 個鐘終於趕到 8 點前到達演唱場地中華藝術館。12 個鐘長途跋涉喎,換着平凡人如小菲都覺得辛苦啦,嘆慣、俾人服侍慣的天王巨星竟然毫無怨言;將長途車的餐食同遇到音樂老師的細節都拎出嚟同大家分享;趕足 12 個鐘就係為咗去綵排,呢種正能量同平日明福俠帶出的人生觀,真係天王級的好榜樣!

黎明的公路之旅影片獲網民大讚。(黎明Facebook截圖)

講咁耐,其實都係想講舞台王者當然用嚟崇拜的偶像。郭富城過咗五十歲都跳唱七分鐘,呢啲都係畢生努力鋪出的好成績,值得你的掌聲。而明福俠(發哥更甚)近年亦轉咗喺台下發功,努力發揮各種做人美德,除咗演唱會事件「有承擔」更是講得出做得到嘅「使命必達」。天王級人馬用力將各種長處在各個角落發揮到最長,而非浪費食物耍大龍鳳玩排場將空洞的平凡以極致的過程做一場天才表演。

其實有時候做人好簡單,要人 worship 你唔係因為你有無本事做或者有無本事做得到,而係你個心係想做好件事,定係因為想人讚好你。所有事用心做,做得好咯人地自然會欣賞你;而唔係將所有事都要俾你知道你做得到(重要做唔好),加上做得唔好都讚好你其實唔係欣賞係鼓勵咋。新一年,共勉之。

(文章純屬作者意見,不代表香港01立場。)



原文連結



0 comments:

Post a Comment