2017-11-21

【輔仁媒體】Fava Bean:毒理學家:香港係冇黑色嘅蛇嘅! (413)

文:穆醫生&Erick

首先,我們來看一個真人故事。


「收咗個俾蛇咬嘅病人。」我剛進門,護士便從護士站喊過來。

「咩話!」我不由得大為震驚:「香港有蛇㗎!」

「病人琴晚響X園到被咬。」

原來是在郊遊時被咬到的,那還算合理。我信服地點點頭,又大為震驚地問:「咁佢有冇七孔流血吖~」

「佢響床邊睇梗報紙,你自己去Check下啦。」

一般而言,遭動物咬傷的病人會送往骨科病房,接受清創以預防傷口感染。既然送了上內科病房,說明病人肯定有中毒病徵。病人清醒無氣喘,說明呼吸肌肉不受影響;點滴位置無滲血,說明凝血功能未嚴重受損;腳踝腫脹,無壞死徵兆,脈膞、動作與神經反射正常,說明沒有藉口傳呼骨科接走這位病人,今晚得靠我們了。我嘗試在腦中搜尋蛇毒的處理方式,回想起小學時代看的記錄片,說被蛇咬後要保持冷靜,緩慢步行,以免心跳加快促進血液循環,令毒素擴散,然後冷靜撥電話叫救護車⋯⋯啊這裹就是醫院⋯⋯然後注射血清。

我打開內聯網,點擊藥房的血清列表,發現居然有近十種血清,害我一下子選擇困難症發作,趕緊撥打頁面末端貼心地附上的二十四小時熱線電話,諮詢毒理學醫生的專業意見。

在我口沬橫飛地描述完病人的維生指數、病史、傷口狀貌與驗血報告後,一直保持沉默的毒理學醫生終於開腔:「咁條蛇呢?」

「噢!」我好遺憾地說:「佢走咗。」

「唔係,我係想知佢咩樣?」

「唔⋯⋯病人冇影相⋯⋯佢話佢係黑色。」

「喔。」毒理學醫生頓了一頓,突然語出驚人地說:「首先,香港係冇黑色嘅蛇嘅!」

我不由得大為震驚,感覺人生迄今的世界觀被徹底刷新了,長居在此多年,連香港有蛇都不知道,更遑論會知曉此地沒有黑色的蛇!我兀自沉溺在震驚之中,電話筒對面卻連珠炮發地說下去:「所以最有可能都係病人響黑夜中睇到條蛇,黑忟忟就以為條蛇都係黑色。香港最多嘅就係青竹蛇,加上傷口嘅形態,凝血功能同腎功能又正常,最有可能都係佢啦。你就比嗰款血清啦。其他都係驚橫紋肌溶解症同血管內瀰漫性凝血啫,留下尿抽下血咁囉。」

我像聽天書般邊聽邊點頭邊抄書,沒想到世上真的有人可以憑一通電話就判斷出未曾謀面的蛇的真身,神奇堪比靈媒問米,真是讓人配服得五體投地啊!當夜我們為病人注射血清後,除去藥劑師致電來求救指血清只附泰文說明書、我本想開啓Google Translate相助卻發現手機上無泰文鍵盤的插曲外,就一夜無事了。

幾天後,我路經該病房,進去轉轉時發現病人已出院。那位病人入院當晚當值的護士問我:「佢冇嘢吖嘛?」

「冇乜嘢吖,出咗院啦。」

護士喔了一聲,仍舊面色陰鬱。我見他莫名地心情低落,便打哈哈道:「乜佢住院期間好多嘢投訴咩?你咪叫佢去食蛇羹報仇囉。同理行山小心啲,唔好再踩到人地條尾啦,哈哈。」

「其實X園唔係山,係屋苑嚟㗎。」護士說:「我住響嗰頭咋嘛。」

⋯⋯咦!!!


究竟,毒理學家講嘅係咪真嘅呢?係咪憑著「香港冇黑色嘅蛇」咁樣去斷定用邊隻血清呢?

如果,有善信野外放生非本地嘅蛇,可能係黑色,可能唔係青竹蛇,咁本地醫生係咪完全零經驗連血清都未用過靠估呢?


首先請讀者問下自己睇完篇文您係最記得「條蛇究竟係咩色」定係以下呢幾段嘢:

1. ……肯定有中毒病徵。病人清醒無氣喘,說明呼吸肌肉不受影響;點滴位置無滲血,說明凝血功能未嚴重受損;腳踝腫脹,無壞死徵兆,脈膊、動作與神經反射正常……

2. ……維生指數、病史、傷口狀貌與驗血報告……

3.「……傷口嘅形態,凝血功能同腎功能又正常,最有可能都係佢啦。你就比嗰款血清啦。其他都係驚橫紋肌溶解症同血管內瀰漫性凝血啫,留下尿抽下血咁囉。」

而毒理學家其實就係憑住成隊醫療團隊咁充分檢查嘅數據同癥狀不斷排除(Rule Out)各種可能中嘅蛇毒去作出當下最合理嘅判斷同後續檢查。你送過畀蛇咬嘅人上醫院就知「位傷者記憶中條蛇乜撚嘢樣」係好唔可靠,亦好難憑傷者嘅記憶搵到係咩蛇。但係唔知咩蛇唔代表醫生唔使做嘢,呢個時候可靠嘅就係各種癥狀同臨床檢驗去斷定邊一類血清可以用喺病人身上(Warrell,2010)。世上總會有千奇百怪的突發事件,不懂得處理不是問題,最要緊的是迅速求助相關領域的專家。

Warrell, D. A. (2010). Guidelines for the management for snake-bites. World Health Organization.

關於作者:Fava Bean

廢青一條



原文連結




0 comments:

Post a Comment