2017-11-22

【輔仁媒體】薰華:要有幾鳩先會以為梵蒂岡係靠旅遊業搵食? (613)

自由亞洲電台早前報導咗一條新聞,堪稱中國每月鳩事嘅MVP。條新聞係話,中國旅遊局下令旅行社不得組團去梵蒂岡(同埋帛琉)旅遊,以期可以向呢兩個國家施壓云云。

睇到條新聞真係笑到肚都爆,腎呀腸呀都流晒出嚟,呢一嘢真係完全顯示緊中共有幾自大,而又自大到一個幾鳩嘅地步。自從有咩限韓令之類嘅嘢出現,中共嘅媒體就會周不時話當地中國旅客大減,搞到當地經濟。佢哋嘅人又真係信呢個「發展中國家」嘅國民去「使錢」係人哋嘅經濟支柱。不過其實搞咗咁耐,人哋根本就唔多想你班中國人去,限咪限飽佢,你班中國人一碗嘢三份食真係核突又度縮,冇咩事唔好嚟添呀。

而最鳩嘅地方係,佢哋係可以會畀自己用嚟洗人民腦嘅大話呃返轉頭。中共好笑之處,就係會將自己嘅宣傳攻勢當真,真係以為唔畀中國旅行團去畀人劏會影響當地經濟,仲會拎嚟做外交桌上嘅籌碼。今次嘅限制旅遊令對象係梵蒂岡同埋帛琉,兩個都係承認中華民國嘅國家,中共用限制旅遊令嚟施壓要兩個小國乖乖服從自己,由外交戰去孤立台灣呢個嘅心態非常明顯。

但係,個問題係,當限制旅遊令真係有用,用呢條橋去搞帛琉都仲勉強叫合(佢哋嘅)邏輯;但係用嚟搞梵蒂岡,就真係太鳩。

首先,梵蒂岡係唔係小國呢?冇錯,呢個國家在冊人口不過千、國土不過一城,軍警又完全依賴外國人。之但係梵蒂岡佢係一個神權國家,佢真正嘅國民人口,唔多唔少就係十三億──亦即係全球十三億嘅天主教徒,包括中共喺香港養嗰四隻狗頭嘅其中兩隻,都係呢個國家嘅「精神國民」;而呢個國家亦唔係一個追求GDP嘅國家。就算「限梵令」真係有用,教廷都唔care囉~

更何況,「限梵令」亦都唔會好似「限韓令」咁,多少會影響到幾個專食中國人水嘅商家佬。頭先問過下啲天主教徒,梵蒂岡入面連間紀念品店嘅店員都係神父、修士、修女嚟,佢哋嘅「收入」只有教廷出畀佢哋嘅零用錢,話知你冇生意佢哋都係食咁多著咁多。唔止紀念品店,根本上至教宗本人,同埋梵蒂岡政府(a.k.a. 教廷)入面大部分人都係神職人員或者係修士修女。在俗僱員唔係冇,咪就係瑞士衞隊、警察同埋消防,仲有啲其他僱員咁,但僱主都係教廷囉。

咁你話呢啲人都要出糧,條數都唔細,不過又唔好唔記得,教會嘅收入主要係「捐獻」吖嘛。定係你中國旅遊局可以禁止6000萬意大利人捐錢畀教會呢?都未計教廷有幾多儲備同地產;仲有,人哋本身就唔收入場券,除非你要入聖伯多祿大殿同西斯廷教堂睇好嘢;至於梵蒂岡其他地方,根本就係唔開放嘅。學得你中國人咁咩,入廟拜神都要收入場券咩,收咗入場券就咩禁地都畀人入畀人搞咩。

再實務啲嚟講,中國亦都冇辦法禁止到任何人行入去梵蒂岡。首先意大利同梵蒂岡嘅國界係開放嘅,基本上你入得申根區境內你就可以自己(喺開放時間)行入去。你話咁佢唔畀旅行團帶人去梵蒂岡啲人咪唔識路囉,咪撚鳩啦,咁個領隊咪安排喺協和大道解散自由活動囉,旅行社撚知啲客自己行去邊咩~成件事除咗放蛇之外根本就冇咩辦法控制到,但真係放蛇分分鐘條蛇玩得仲開心;一係咪連協和大道都唔畀去,再唔係連羅馬城都唔畀入囉。中國人啲「變通」嘢你中國政府唔係唔知啩?

而且,其實人哋先冇興趣畀你班唔識尊重宗教文化嘅癲佬入嚟搞搞震呀;唔入嚟仲樂得個教門清靜添;慕道入教歡迎,宣揚國威?你不如走把啦。

《孫子兵法》有云:「知己知彼,百戰不殆。」依家中國整個限梵令出嚟,仲期望個限梵令可以喺外交場度發揮作用,呢啲咪叫「不知己不知彼」囉,「每戰必殆」就梗架啦~



原文連結



0 comments:

Post a Comment