2017-11-20

【輔仁媒體】霏子:而家啲細路真係好慘 (389)

我叫Fayly,今年二十二歲,讀緊full-time master,下年畢業。喺大學五年中,我嘅收入來源有二,其一係補習,其二係搞活動。我做咗補習四年半,我發現而家啲細路真係好慘,好撚慘。

呢一年,我嘅主要客戶係一班細路,佢地大概三至十歲。我嘅任務係教佢地中文,幫佢地升小學、升中學同轉校。佢地兩歲開始上幼兒班,認字,畫圖,學啲乜撚嘢團隊合作、領導能力、危機處理,準備幼稚園面試。呢個階段仲係開心嘅,因為佢地唔知道辛苦,可以混過去。

哈哈,上到幼稚園就嚟料啦。佢地啲功課有幾深唔使講啦,人地K2做緊200字閱讀理解,我K2寫緊生字咋。而且,佢地要不停上興趣班,為升小學作準備。我而家補緊嘅一位學生,係早上七時三十分,已經要上我嘅堂,冇錯,係07:30a.m.,有一次我唔得閒,問可唔可以改時間,佢老母都話唔得,因為九時之後嘅schedule已經full晒,佢要學足球、心算、劍擊、中文等等,直到晚上。

「等等,Fayly你唔係教中文㗎咩?佢又上?」聽到呢道,我啲朋友會咁問。

「係呀,不過我係負責面試中文咋,即係自我介紹、說故事、問答。佢仲要上常規中文呀,即係書法、重組句子同閱讀理解呀。」 人地得五歲人仔咋,就忙成咁啦,我五歲嗰陣做緊乜撚嘢⋯⋯

「考間小學唧,使唔使咁喪呀?」

「要。」

今年,拔萃男書院附屬小學(DBSPD)就表明,報讀小一時,家長可以交上最多八版紙,作為仔仔嘅額外資料,仲話希望見到家長的心思同手工,而非花錢到外製作嘅個人檔案。屌你,八版呀,係八版CV呀,我依家學士畢業讀埋碩士,都係得一版CV啦,個細路得五歲咋,就要嘔八版出嚟啦,你話驚唔驚?DBSPD小一家長簡介會之後,我就見到班家長痴咗線咁學Photoshop、Illustrator、手工,幫個仔執CV,個情況真係可悲又可笑。

「車,佢話可以交咋嘛,你唔鍾意咪唔好寫囉。」

「人地個個都寫,得你唔寫,你估人地揀唔揀你啊啦?」

「屌,競爭咁大咪唔好入囉,全香港又唔係得佢一間名校。」DBSPD有得畀你爭已經算好,聖保羅男女中學附屬小學(SPCCPS)係講明,今年小一學額不多於70%給予與學校有關係的申請人、不少於30%給予其他人士。即係假如你冇關係,入到嘅機會係極小。有啲小朋友,係想爭都冇得爭呀。

而家升個小學好似打仗咁,班家長、細路可以唔喪咩?

「小學喞,使乜爭成咁喎。你有料嘅,日後都會成功啦。」

係呀係呀,我有料嘅考入哈佛大學都得啦,問題係條路崎嶇好多呀嘛。班細路冇得揀,佢地自細就要爭,唔係嘅話,佢地大個想爭都冇資格。喺香港生存,真係咁撚悲哀。你今日唔行,聽日就要跑,你行唔行?

唉,而家啲細路真係好慘。

關於作者:霏子

迷離的字,霏微下的女子。不聽師長勸告,執意修讀中國語言文學系,正處於自甘墮落的狀態。



原文連結




0 comments:

Post a Comment