2017-11-07

【立場新聞】葉一知:爭取叫雞要用八達通 (1686)


大鳴鼎鼎嘅雷鼎鳴教授今日出席研討會時語出驚人,直指:「我識得朋友叫雞(召妓)嘅,佢話叫雞都可以拎部手機出嚟照,香港呢啲嘢仲未做得到。」

以雷教授嘅身份同社會地位,用叫雞嚟證明大陸科技發達,真係相當獨特,但似乎不太恰當。游BB當日語出驚人話「香港年青人扑嘢都冇空間」,大概雷教授受此啟發,以過來人…..唔係,朋友講啫(雷教授跟建制派友好,而馬恩國去年曾經搞過「一帶一路訪京KTV尋歡團」,唔知佢朋友係咪當中之一),以此一驚人sound bite力撐電子支付,大概要為即將殺入香港嘅支付寶造勢!可是,人家妙齡少女講就叫人想入非非,你雷老頭講叫雞,大家腦海中就只會聯想到一條老淫蟲在眉飛色舞笑口淫淫大談叫雞押玩少女嘅經驗,未免影響了親共陣營第一經濟學者的形象了。

最慘係支付寶。雷教授呢句sound bite名垂千古,近來講起大陸電子支付就聯想到支付寶,依家支付寶就建立咗「叫雞都用」嘅品牌效應,支付寶從此變成「雞付寶」(用普通話讀,「雞」=「支」),彷彿世界有一種專為叫雞而設的電子錢包。莫說香港,全世界科技都大大落後了。

大概雷教授想用很誇張的例子來證明支付寶的方便,問題是,叫雞嘅人一定比冇叫雞嘅人少得多(女性就不包括在內了),咁呢個例子點樣證明支付寶好先進和對生活好方便呢?還有,據知,大陸的色情事業係犯法架喎,叫雞又係犯法架喎,雷教授卻以此為榮,即係話:「支付寶可以用嚟幹非法勾當,用支付寶可以洗黑錢、買毒品,甚至畀贖金、付贓款,幾咁方便,幾咁值得推崇。」

如果呢個邏輯成立,不如建制派立法會議員聯同楊偉雄和應:「大陸叫雞可以用支付寶,有咩理由香港叫雞唔用得八達通?」掛幅「成功爭取叫雞可用八達通」嘅banner,保證選民紛紛投票。雷教授又講過,香港唔發展郊野公園係蠢事,咁香港唔發展「交際公園」,唔畀用八達通叫雞,都係蠢事。

創科局長楊偉雄就話過:「唔好搞咁多網上登記,資料好易外洩。」哈哈,楊偉雄都蠢唔晒,至少我諗佢唔贊成叫雞用支付寶畀錢。國家需要一個教授時,會讓他叫雞叫放題,隻眼開隻眼閉,但國家不需要呢個教授時,你的叫雞記錄便會無端從電子支付程式流出,電子交易一一列出並流傳網上,愛國教授就變淫魔教授。唔信你問吓大陸啲高官權貴,叫雞敢唔敢用支付寶?

不過有一樣嘢係可喜嘅,就係雷教授喺研討會上話,大陸經濟一定唔會爆煲,一定唔會出現「支爆」。還記得雷教授話過,佔中為香港帶嚟3500億損失,點知呢三年嚟,樓股齊升。雷教授實牙實齒話一定唔會支爆,哈哈,你知咩事了。

 

作者facebook



原文連結



0 comments:

Post a Comment