2017-10-31

【輔仁媒體】神婆:【塔羅個案】個客認為喺放工時間嘅金鐘地鐵車廂入面睇英文書會增加異性緣 (901)

「如何脫離單身」係我舖頭最受歡迎問題入面嘅 Top 3,咁大家想拍拖嘅目的都有少少唔同嘅,有啲真係因為寂寞、有啲就因為屋企人施加好大壓力,有啲就因為覺得「人有我無,我家下好差咩,我條氣唔順」,真係咩原因都有。

咁我都想借機會澄清一樣嘢,假設一個人生活好 Stable 咁朝九晚七地工作、而黎緊亦唔會有任何環境上嘅變化(例如轉工、報 Master 等等)嘅話,咁我好老實,你呢一刻無對象,開塔羅牌都好少會出現啲咩突破,頂多係話比你知你黎緊繼續「生活平淡」咁樣。

又或者咁講,如果你單身咗幾年,黎開牌,個塔羅師父同你講「喂恭喜哂!你行正桃花,黎緊半年有拖拍」,你聽到都應該覺得好唔實在吧?(不過我仲係歡迎感情運查詢的~LOL)

單身,真係可以有好多原因。社會有一個好差嘅風氣,係覺得「無論男定女,到咗一定年紀,未拍過或者無拖拍嘅,就係有問題」。但係,我見客幾年黎嘅感想係:我可以好肯定咁講,有好多單身嘅朋友,本身外在內在條件都唔錯,只係因為工作太忙,根本無時間去交際經營關係;當然亦有部份人真係…明顯地…個人係怪怪地,或者有啲交際上嘅問題,導致根本無人想埋身。

Emily 約咗我夜晚 18:30 占卜,夜晚係我生意嘅黃金時段,偏偏 Emily 遲咗差唔多半個鐘,所以我對佢印象麻麻;我當時心諗,你 17:30 嘅時候已經話喺尖沙咀放工,過銅鑼灣駛唔駛用個半鐘呀?

可能感覺到我不滿佢遲到,Emily 用一個好天真嘅表情望住我,「唔好意思呀,我遲咗少少,不過呢,金鐘個站好多人,我又唔鐘意逼,我又著高踭鞋,要慢慢行,所以花多咗時間先過到銅鑼灣。」

聽到呢度,我唔知點解笑咗出聲,「如果返工放工要逼車,不如考慮吓著返平底鞋,妳或者會舒服啲。」頭先 Emily 行入舖頭時我已經留意到,佢腳踏一對 3 吋高踭鞋,但係兩邊腳側都有刮損紅印,貼幾多透明膠布都遮唔住。

「唔得呀,著平底鞋個人唔夠 Elegant,好無教養。」

……我望一望自己著緊嘅羊皮平底鞋,嗯,好啦,我係無教養嘅。

Emily 話自己工作唔順利,上司同事都唔係好鍾意佢,想知點樣先可以令其他人認同佢;另外一個問題係單身咗五、六年都無男性埋身,「頂多食到一次飯就無下文」,想知道點先可以遇到自己嘅真命天子。

喺 Emily 講完佢嘅問題之後,佢電話響;佢打開個袋,我居然見到一本 Jane Austen 嘅書,個心有少少改觀,原本都覺得 Emily 似係傻豬港女,估唔到有閱讀習慣,仲要係睇英國文學。

「我都鍾意睇佢嘅書。」我忍唔住開口,「以前中學要讀 Eng Lit。」

「吓?佢咁出名架?」Emily 個樣好 Surprise,「我喺阿妹個書架攞架咋,網上面咪有啲文話,男仔鍾意女人有深度嘅,所以我放工坐地鐵呢,都會拎住本書扮睇,人地隔離煲 TBB 劇,我就睇英文書,咁話唔定會有男仔留意到我呢。你知啦,放工時間黎黎去去嗰班人上車落車,睇劇都有啦,緣份天注定,話唔定有一日有個男仔留意到人海入面,我居然喺度睇緊英文書,會覺得我特別出眾⋯⋯」

我聽到一半個腦已經放空,即係咁,好多單身男女嘅致命傷,就係自我意識過剩,有異性埋身,就馬上 FF 到八千哩外咁遠;試過有客因爲男同事喺公司幫佢拎個杯去洗,就覺得人地溝自己,後尾發現人地有女朋友,就喊住黎搵我話比人始亂終棄。

不過,自我意識強烈到 Emily 咁嘅客人,我都係第一次見;唔怪得喺尖沙咀過銅鑼灣要用個半鐘,到底呢位小姐喺個多人到爆裂嘅月台上面,拎住本 A5 Size 嘅書打開扮睇,係吸引到異性仰慕嘅眼光,抑或係其他人覺得佢做乜勁嘅眼光,我就真係不得而之。

其實好多時啲客都係咁:自己認為係點,就係點。香港係個好盲目嘅社會,大家都好攰,唔會有咁多「地下鐵碰著她」,就算真係有個男仔唔知做乜衝埋黎話「我留意咗妳好耐,覺得妳好與眾不同」,問心,你會覺得呢啲係緣份,定係搭訕,定係覺得對方想 sell 嘢?

Emily 黎緊嘅感情運就當然麻麻,上半年一隻倒牌賢者,下半年一隻正牌星;不過,無論有無人出現都好,如果佢繼續用呢種心態去經營自己嘅形象,我就惟有默默祝福佢了。

【塔羅牌個案分享】

關於作者:神婆
神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage



原文連結




0 comments:

Post a Comment