2017-10-18

【輔仁媒體】容樂其:中共十九大嘅文宣話我知,佢哋真係想搶年輕人支持。 (582)

啱先喺睇左中共十九大兩段《人民日報》製作嘅文宣短片,

一係短片《千万条路,中国共产党与你一路同行》

二係短片《Come on!60秒网罗我们这五年》

喺香港反對派/建制派二元嘅輿論格局,好容易就只有得出唱衰與唱好的結論,而反對派好鍾意乜都用「中共大把錢」來簡化政敵嘅成功。

十九大呢家嘢,我以為中共會好充份咁箝制反對意見,令關鍵敏感詞唔出現喺大眾媒體,再然後用大量聲色犬馬去令大眾唔理正經嘢,達到管治嘅效果。

而拍片嘅文宣,我嘅認知就係,好似幾個月前嗰段咁十九,請班明星名人講乜鳩中國夢。

(慎點擊呀真係會睇到嘔的)

但原來已經唔只係咁。

先講下《千万条路,中国共产党与你一路同行》講乜:

主要係講,中共八千九百萬黨員,喺十九大呢,呢八千九幾萬人係被2280人代表嘅(所以十九大全名係中共共產黨第十九次全國代表大會嘛,派代表來開會)。

咁呢,兩千幾人之中,就有呢六個。

睇圖先:

有郵差、有掃地阿叔、有村幹部、有工程師、有農村教師。

郵差、掃地阿叔同工程師唔洗我多講。

村幹部係乜?佢條村嘅人可能連香港一棟樓都多過佢,即係話佢可能連區議員都唔係,佢只係區議員其中一隻樁腳。

農村教師係乜?五個小孩的校長嘅窮版啦,大陸教書人工無香港咁高的。

好核突好矯情好假?係。

然而中共就係話俾你知,一個影響咁大嘅全國大會,以上身份嘅人都有得入去投票。中共唔會迴避你係被代表,但中共已經反客為主,同你講,就算身份睇落幾卑微,你嘅政治權利都係被重視。

可以自己睇睇條片

然後仲有呢條《Come on!60秒网罗我们这五年》,呢條呢,我會覺得一定要自己睇。

睇左先講,按落張圖就會飛去微博個POST:

其實成條片得啲字飛來飛去。

中共好直接咁問你,你肯唔肯放棄呢五年嘅嘢去換青春。咁當然呢啲科幻問題係無得揀。

然後中共又好直接,咁逐樣逐樣咁,將呢五年裡面年輕人經常用嘅新嘢潮嘢,飛飛閃閃咁列出來俾你睇。

幾咁壯觀,中國幾咁強大,你們幾咁幸福。

獲得感呀。你班人係得到好多嘢架其實!

中共係好針對而家嘅80、90、00年輕人,喺媒體上去「做工作」。是的,係「做工作」,呢個係好中共嘅說法,照字面解就得,真係落手去針對年輕人做啲嘢。

先唔講是否成功,至少係中共係出擊,要搶呢堆人嘅支持。

呢兩個月我都感受到,香港嘅建制派都好銳意反攻社交媒體輿論,我睇到嘅係民建聯日日直播,我睇到工聯會吳秋北都玩FB 仲要加HASHTAG,當然啦有份同我玩嘅容海恩就唔好提太多了費事又被人話我多左個家姐。

我認為中共反攻年輕人輿論,應該係來緊國策級嘅戰略。佢哋唔再係死守玩刪你帖,佢係要年輕人睇佢嘅嘢唔睇你嘅嘢。

關於作者:容樂其
我覺得總編輯都有得出文係常識囉!



原文連結




0 comments:

Post a Comment