2017-10-13

【輔仁媒體】白木乩:十一歲,應該係日日睇曬下午卡通片嘅年紀。 (2579)

偷圖的

十一歲,應該係返小學五年級嘅年紀。

十一歲,應該係見到冰浮喺凍檸茶上面會問點解嘅年紀。

十一歲,應該係見到屋企有蟻會跟住佢睇下佢個竇喺邊嘅年紀。

十一歲,應該係常識堂學乜係月經夢遺嘅年紀。

十一歲,應該係偷偷望下隔離兩行女同學嘅年紀。

十一歲,應該係好鍾意偷偷玩前面女同學條馬尾嘅年紀。

十一歲,應該係留意到女同學著體育衫飛釘敢睇唔敢笑嘅年紀。

十一歲,應該仲係細細粒被幾個/全班女同學高過自己嘅年紀。

十一歲,應該係會同男同學鬧交/打交嘅年紀。

十一歲,應該係小小事都懷著「我先唔會認輸」心態嘅年紀。

十一歲,應該係一放學就諗去邊度玩/睇咩電視好/打咩GAME 好嘅年紀。

十一歲,應該係背到電視台幾點會播邊套卡通片時間表嘅年紀。

十一歲,應該係偷隔離屋拖鞋丟落街被人捉到藤條打到痛三日嘅年紀。

十一歲,應該係中秋去煲蠟燒左個涼亭嘅年紀。

十一歲,應該係新年食好多糖都唔理肥唔肥嘅年紀。

十一歲,應該係諗吓過兩年去邊度讀中學好嘅年紀。

十一歲,應該係開始領會喜怒哀樂嘅年紀。

十一歲,應該係開始思考人生嘅年紀。

十一歲,唔應該係諗去死嘅年紀。

十一歲,唔應該係諗點樣可以死快啲嘅年紀。

關於作者:白木乩
白木乩
聽聞係總編分身,專用來出D 與總編身份不符既膠文



原文連結




0 comments:

Post a Comment