2017-10-18

【香港01】詩寧:放產假真係咁爽? (1384)

01博評-生活

作為孕婦,聽到香港首位女特首林鄭月娥份施政報告話會研究增加產假同侍產假,我當然替往後幾年生BB的在職媽媽高興(講真搞得嚟我都生咗,得唔到益),但同時,我都有擔心如果只係「加假」而無加強教育或配合其他改善職場文化嘅宣傳,「加假」亦同樣會增加在職媽媽被歧視的情況和壓力。各位未婚男女,係咪睇到呢度已經想鬧:「比你放多啲假都不滿,比你放足一年好唔好呀?」重申,唔係不滿,而係擔心,因為真係好多人會無啦啦憎恨一個大肚同事,原因?因為佢即將會有產假,驚佢放假嗰陣,自己會做多咗嘢囉。

林鄭建議將產假由10星期加至14星期,侍產假則由3日加至5日。勞工及福利局長羅致光亦指,有信心喺一年內提出延長產假嘅具體方案,樂觀估計最快3年內完成所有程序。

隨住社會進步,母乳餵哺都提倡咗好多年,而1968年沿用至今嘅《僱傭條例》入面嗰10星期有薪產假講真絕對唔夠,中國人成日講嘅產後坐月,其實係講緊最好坐100日,即係三個幾月,當然,老闆同同事一定唔肯啦,如果真係可以做到14星期有薪產假,坦白講,對僱主同僱員嚟講都算公平。孕婦產後可以多陪BB,餵母乳亦需要一個適應期,無女人係一出世就識餵,都係要生完慢慢學,休息多啲,調理返個身體同心情先返工,工作效率都提升。

而且,應該無女人會為咗放個產假而懷胎十月,嗰十個月嘅不安同不適真係唔易過,未婚同事眼中的「享受產假」,背後阿孕婦同事其實受咗好多苦。你腸胃炎兩日要繼續返工都辛苦啦,何況孕婦頭三個月都又暈又嘔,就算無嘔,都會不由自主地極度眼瞓!信我,真係唔係偷懶,真係眼瞓到好似食咗好多好多感冒藥咁,隨時、立即、半秒就可以入睡。仲有尿頻、食慾不振、忽冷忽熱、易餓……

孕婦產後餵母乳亦需要一個適應期。(視覺中國)

「生得仔就預咗架啦」,係,我知我大肚關你鬼事,你無義務去關心同理解孕婦同事,但我哋有個卑微願望,希望你記得你媽媽都曾經係孕婦,期望你大慈大悲唔好歧視孕婦,唔好一產檢就覺得佢呃假、去多幾次廁所又懷疑佢蛇王……

我聽過一啲在職孕婦被歧視嘅過份例子,Jennifer喺一間小型公司做OL,連埋老闆四個人左右,同事間相處一直無問題,直到佢大肚,大家就對佢有不知哪裡來的怨氣,可能係嬲佢初期不適請咗幾日病假?又可能嬲佢成日肚餓一邊做嘢一邊食卦,總之就除公事以外唔同佢講嘢,就算講嘢都係單單打打,講咩放產假會少咗個人,會做死之類……Jennifer一直忍忍忍,直至懷孕6、7個月左右,有日返到公司發現檯頭部電腦唔見咗,得返個鍵盤,上面貼住張紙寫「壞機」,佢呆咗,明明尋日放工都好地地,點解第二朝個位就會變成咁?佢問同事,大家話唔知,佢問老闆,老闆話:「係呀,部機壞咗,無嘢比你做,你請日假返屋企抖啦。」講緊日假當然唔係公司送,係用Jennifer自己年假或無薪假,眾同事嘅面口同語氣令Jennifer知道「壞機」係假嘅,大家只係喺度嘗試用各式各樣小動作去迫佢辭職,出動到收起部電腦呢招,都真係夠無聊。Jennifer無走到,喺公司呆坐咗一日,坐喺度就有糧出聽落好似好爽?但當你設身處地咁諗,明知自己比人歧視緊、比人玩緊,但又唔可以動氣(因為大緊肚)、唔可以辭職(因為聽講養一個小朋友要400萬),加上懷孕期間情緒比一般人易波動……比人當透明咁坐一日其實一啲都唔爽。

台面得返個鍵盤(視覺中國)

早排,我亦收到讀者訊息,話大肚之後被上司針對,要佢長期留喺貨倉點貨,唔比佢出貨場對客,務求悶走佢,可唔可以告個上司?唔好意思,法例只係講明「僱主不得分派處理重物的工作予孕婦」、「不得安排孕婦在會產生對懷孕有害氣體的地方工作」或「不得讓孕婦處理其他會損害懷孕的工作」,呢位上司只係叫佢點貨,1、2、3、4...每日重覆數,犯唔犯法?可圈可點。當然可以試吓告,但係證據呢?上文已經講咗好多懷孕期間嘅不適,咁唔舒服仲要去搜集罪證,過程中少不免影響心情,然後又擔心影響胎兒,萬般壓力……你估放個產假真係咁過癮?

即使你係剛畢業嘅少女,甚至係男人,「懷孕」同交通津貼一樣都關你事,因為你一定有媽媽,或者仲有家姐、細妹,亦遲早有老婆卦?你都唔想親人受到上述對待,不如喺產假被立法延長至14星期前,你都幫幫手放低怨氣,改善職場文化同氣氛吖,都係嗰句,唔期望你做多,減少歧視已經好好。

(本文純屬作者意見,不代表香港01立場。)



原文連結



0 comments:

Post a Comment