2017-09-17

【輔仁媒體】焦總的蕉很腫:Blame the victim 最高尚 (1732)

今朝坐地鐵個陣,
聽到兩個坐係關愛座既阿叔對話:
甲:尋日海洋公園咪死左個𡃁仔囉。
乙:而家啲後生都白痴架,好人好姐走去撞鬼,咪抵死囉!
甲:咪係囉,食飽飯無屎痾,正正經經去讀書咪唔洗死囉!

一年前既我聽到呢啲說話,應該會上晒腦勁火爆,
但今時今日,我已經慣左香港人嘅邏輯。

Suppose 海洋公園既鬼屋係唔會整死人架嘛,Right?
就算入面幾黑幾暗都好,
都有工作人員,都有cctv,
絕對無可能俾個細路停留係有重物下墮既地方架嘛!
絕對無可能俾個細路有機會撞到個棺材木架嘛!
咁發生左意外既原因唔係個設施setting有嚴重問題咩?
唔係有管理問題或者人為疏忽咩?
點解個責任會落左係個死左既細路身上呀?

即係有女仔夜晚著短裙出街俾人強姦左,
大部份人都會話個女仔唔應該夜媽媽著住短裙出街,
責任就落左係個受害者身上面,
而施暴者就彷彿無一啲責任都無。

同一樣既邏輯,假如有人去玩bungy jump,
點知條繩斷左,
香港班阿叔阿嬸又會智者上身,
又鬧班後生玩到無野好玩,玩跳樓,
好人好姐唔去跳咪無事囉!

咁文化大革命俾人批死鬥死個班智識份子,
相信都會俾人鬧好人好姐做乜讀咁多書呀?
正正經經耕田咪無事囉!

華人,最鍾意就係扮智者,
扮高尚,面不紅耳不赤咁講一堆歪理。
呢啲劣根性,真係世代相傳架!
仲有最叻就係欺善怕惡,
大家都唔敢鬧掌權者及施暴者,
咁咪鬧受害者囉,向弱者抽刀既事,
大家都鍾意做,
再擺出一副高人一等既智者咀臉,
一口便斷定是非對錯。

今時今日既香港,
好多老人家鍾意咁樣做,
更多政棍鍾意咁做!

重點係有好多人信!

關於作者:焦總的蕉很腫



原文連結




0 comments:

Post a Comment