2017-09-05

【輔仁媒體】阿享:香港地做運動員真係慘過食屎 (1672)

見到好多人話我太緊張話我成名後壓力大我係亞錦後講過亦應承過自己唔會再因爲別人加諸既壓力而緊張唔會因爲一啲人地唔洗負責任既説話而令自己一直既努力付諸東流對我黎講一啲都唔值得我知道有好多人係出於好意但係如果今次你都覺得群眾壓力…

Posted by 楊文蔚 Cecilia Yeung on 2017年9月4日

跳高女神楊文蔚繼世大運之後再次拎唔到牌,香港人嘅glory hunter因子發作,開始質疑楊文蔚係咪被吹大左。然後,一邊箱話唔好拍咁多廣告,專心啲投入訓練,咁就會好成績;另一邊箱又有人話,唔好俾咁大壓力自己,放鬆啲云云。

訓練多啲正常黎講係會成績好,之但係,究竟接多左廣告又係咪會影響到成績?我本人就好懷疑。咁又睇下楊文蔚依家成績係咪真係唔好,1米84嘅成績係全運會排第3,首先係保持到世大運嘅成績,亦只係因為試跳次數多過人地所以拎唔到牌。即係話,全個大陸佢入到頭3喎,咁真係成績唔好?真係唔夠努力?

老實講,香港運動員唔接廣告唔通真係你養佢咩。難得楊文蔚出左名,有人搵佢拍廣告已經好好彩,香港有幾多不知名嘅運動員捱得幾辛苦,又要諗練習,又要諗生計。依家,拍兩個廣告又要俾你話唔專注、成績冇咁理想又要俾你話吹大左、個樣靚啲又要俾你覺得係花瓶靠樣,紅左又要俾你話唔識處理壓力太緊張,真係慘過食屎。

問心講,香港咁嘅土壤,培育到世界頂級運動員咩?真係100%港產嘅世界冠軍,世界第一有幾多個有眼睇呀!如果你班人都覺得唔得,咁點解又要運動員交到世界級成績,世界上邊有咁著數架?

關於作者:阿享
一個戒緊牛肉,但打邊爐仍然會忍唔住既耶青。



原文連結




0 comments:

Post a Comment