2017-09-02

【香港01】投稿:前Uber司機:為什麼我們會為區區幾十蚊冒險 (5408)

01博評-香港地

文:大雄

近日澳門先後被颱風「天鴿」和「帕卡」弄得滿目瘡痍,香港人看到不少趁火打劫、幸災樂禍、令人髮指的報道。幸好當中亦夾雜展現人性光輝一面的消息,包括的士和Uber司機義載有需要的巿民等。我特別留意Uber,因我曾是個Uber司機。

話說當時港府對Uber態度仲係瞹瞹眛眛,法庭未有判決時,老婆話我送完個囡返學不如搵啲野做吓,於是我把心一橫成為一個做又得唔做又得的freelance Uber司機。

其實的士同Uber真係完全兩回事,好似橙同蘋果唔可以互相取代。看看下面的例子:

好多人朝早call Uber從九龍過海(很多都不介意行西隧)。換轉是的士,他們call唔call到?

有朝有個後生仔在樂富上車,目的地是青衣機場快綫站。原來他在機場返工,當日遲了出門,要趕搭機場快綫,搭遲一班他就要遲到。結果我們早過那班車三分鐘到,事後他還用WhatsApp多謝我,令我覺得日行了一善!

有次車一位小姐由法國醫院到大埔康樂花園,落車後我發現她留了一包葯在座位上。當時我剛把車停在新達廣場附近,即時call她問如何交收。剛巧她會到大埔墟(今次是她自己開車),我等了她5分鐘就到了,前後不用10分鐘便物歸原主。

最要命的一次是在機場等了兩個鐘接到一個order,當時我車已泊在一號停車場。我打給個客,是位講普通話的西雙版納大媽,她說她們二人在客運大樓,不知往那邊走,我便上去接她們。好不容易才找到,原來她們竟然是去機場富豪酒店!唯有照車她們,真係少啲EQ都已經激死!

又有一次車了一位牢騷王,一上車就狂話的士司機點樣點樣。

畀嗰幾十蚊大晒牙!

唔係大晒,去得唔遠就梗係幾十蚊啦,唔通幾百蚊牙!

我有時真的不明白,明明是客,又沒有得罪司機,為何招來惡言相向?不是他們不想搭的士,是的士司機不想載他們。他們可以怎樣?

不是他們不想搭的士,是的士司機不想載他們。(視覺中國)

有個客一上車就跟我分享搭Uber經驗。她以前在越南工作用開自己司機,回流香港便成為Uber常客。「Benz坐過、寶馬坐過,最多都係Tesla。」幾十蚊有靚車坐仲有私人司機,唔怪得有咁人搭!

相信很多Uber司機都是freelancers,其實賺錢唔多:油費貴又要自己畀,成日塞車,過得海隨時要空車返。為乜?我不排除有部份司機視載客為幫人,從而獲得滿足感。

高鐵和Uber同是涉及交通,講求方便。偉大的司長連一地兩檢明明抵觸基本法都可以諗到「租客再番租一間房畀返業主」呢條轎,Uber咁小兒科又點會搞唔掂?講來講去就是怕得罪既得利益者同有勢力人士,情況有如新界東北發展、橫洲事件,近幾年香港人都見唔少。講真,我覺得共乘比高鐵更便利民生更貼地。你覺得呢?

(本文為投稿,稿件可電郵至iwanttovoice@hk01.com;文章純屬作者意見,不代表香港01立場。)



原文連結



0 comments:

Post a Comment