2017-08-23

【輔仁媒體】神婆:【塔羅個案】有個客為咗受男人歡迎,走去養狐仙 (1222)

其實我好驚啲客人將塔羅牌同 Witchcraft 或者 Dark Magic 混為一談;亦好怕啲客人以為我做占卜,就代表我會識埋紫微斗數睇相風水批命改名,嚴重啲嘅仲以為我識整佛牌養精怪,前排仲有客人問我識唔識催情魔法添。

上面提過嘅嘢,中式嗰啲我有興趣會研究吓,但唔會用喺工作上面;至於養鬼養精怪呢啲,老老實實,我一向係啲比較虛嘅體質,對於帶有負能量嘅物事,我咁多年黎都係避免接觸。簡單黎講,我虧,我係嗰啲年年農曆七月出夜街會有怪事,前幾年去泰國旅行仲撞污糟嘢嘅廢柴體質。

所以,我好驚遇到啲客係養鬼仔、或者條頸掛住個牌,入面有啲黑色焦乾嘅物體,仲有啲油浸住(Sorry 我唔識分呢啲)⋯⋯因爲,呢啲客通常一入舖頭,我就會爆頭痛;有次有個客無問過我,就拎佢養嗰啲唔知咩出黎比我睇,我頭痛到目眩,直奔廁所就嘔,堅嘔,而家諗起都即刻淆淆地。

唔知大家對於呢啲養乜養物係抱住一個咩睇法,我唔會質疑佢地嘅用處(因為我唔識),不過,今日想同大家講嘅,係一個養狐仙嘅女性客戶嘅個案。

咁好老實,Rebecca 唔算係一個好精明嘅女人,佢做侍應嘅,但因為唔識英文,所以黎黎去去都係喺啲大財團連鎖店度打工。佢本身外表唔算特別標青,年紀都唔係青春少艾;偏偏對愛情仲有好強烈憧憬,渴望壯健、俊美嘅肉體同外表,「咁我先有安全感」,佢咁講。

Rebecca 覺得剛剛分手嘅中港貨車司機唔體貼,好快就睇中咗同公司一個新調職過黎嘅男同事;不過對方其實後生過佢好多,工種亦唔相同,照道理就好難扯埋一齊。我第一次開牌時照事實同佢講,佢好失望,仲有啲嬲我,覺得我睇小佢咁。

一個月後再見 Rebecca 佢行入舖頭嘅氣場明顯唔同咗,就咁睇好似神采煥發咗,但唔知點解我對住佢,個頭硬係赤赤痛。今次佢話放棄咗公司嘅後生男同事,「佢太唔成熟,我唔想湊仔」;佢再問一下未來嘅感情運,我話妳黎緊半年都會單身,拍拖機會微。

Rebecca 隔咗兩星期就再黎搵我,話有幾個男人同時 flirt 佢;我好驚訝,副牌明明唔係咁講,呢啲咁簡單嘅問題我點會解錯?但與此同時,望住 Rebecca 時我又開始頭痛,痛到好似有人喺頭頂搵本書隔十秒打我一下咁;而呢個時候我亦留意到佢嘅打扮,基本上可以露嘅都露哂⋯⋯

咁短時間有咁嘅變化,我覺得好奇怪,同時我個心出現咗一個唔好嘅念頭。

「Rebecca 妳最近生活習慣係咪同以前有啲唔同?」
「係呀,我多咗好多男仔 friend」
「妳參加咗啲 course?突然咁多新朋友嘅?」我梗係知佢唔係會報班上堂嘅人,我咁問都係想睇吓佢會唔會講真話。
Rebecca 個樣有啲囂,「我同以前唔同架啦,我識得發揮我嘅女人味同吸引力,以後到我揀仔,唔駛受佢地氣⋯⋯好嘢就同妳分享啦神婆,我前排搵咗個師傅幫我催姻緣,佢教我養狐仙,佢話每日裝枝花、放件西餅,狐仙就會幫我吸男人!」

講到呢度,Rebecca 喺手袋拎咗一啲嘢出黎,我無仔細望,因為佢拎出黎嗰一剎那,我有啲唔舒服。

嗰日佢問咗啲咩,我都唔係好記得;我淨係記得佢臨走時,我同佢講,「記得有啲嘢適可而止;同埋問清楚妳師傅,點樣可以請走狐仙。」

「我點解要請走佢呀?妳妒忌我靚我多仔溝呀?」Rebecca 眼神一秒間變得好惡,把聲突然變尖,「我唔會走架!妳唔信我就算!」

我呆咗。我識咗 Rebecca 其實都兩三個月,中間都有短訊同我溝通,佢一向唔係咁無禮貌嘅人;同埋⋯⋯

佢最後嘅說話,令我好在意。

『我唔會走』?

我諗返起 Rebecca 嗰一剎那嘅神情同眼神,仲有突然唔同咗少少嘅聲音,我有啲驚。佢係 Rebecca,但同時唔係好似 Rebecca。

我聽人講過,呢啲精怪類嘅嘢,易請難送;佢幫你越多,你代價越大;如果 Rebecca 突然由零變旺盛嘅異性緣(雖然都係啲速食關係)係黎自狐仙嘅力量,咁我相信區區一件西餅一枝花,係點都填補唔到個代價的。

代價係咩?我唔知呀,我唔識呀,我都唔想理,我一向相信好多嘢靠自己好過靠外來嘅力量。

至於 Rebecca 後來變成點,我都唔知,因為佢嗰次之後就無再聯絡過我;而當時介紹佢黎嘅客人 Sandy,話佢地一班朋友都突然無哂 Rebecca 消息,所有 Chat Group Quit 哂,Facebook 轉埋(但唔接受舊朋友 Friend Request)⋯⋯⋯⋯

我諗,我惟一可以做嘅,係祝福佢啩。

【塔羅牌個案分享】

關於作者:神婆
神婆
非典型占卜師,唔神秘,無形象,除了鐘意聽客人講故事,夜間興趣係打機睇動漫同撚貓。https://www.facebook.com/FortunaMessage



原文連結




0 comments:

Post a Comment