2017-08-09

【香港01】投稿:隻身到倫敦工作,才知道搭電梯都有學問 (8332)

01博評-出走

文:檸檬樹

三年前隻身到倫敦工作,為的就是看看這個世界。

在香港土生土長,大學時在加拿大做過半年交換生,沒有說得一口英式英語,仍然膽粗粗去英國工作。

到公司第一天上班,踏入電梯,身旁都是高大的外國人,正在想怎樣融入新同事之際,發現電梯已企滿人,但又無人㩒𨋢門,身為香港人既我,諗到無諗就伸手去㩒𨋢,㩒咗兩下,個門好快就關埋。 之後好幾個星期,我發現基本上除咗我之外,係冇人會㩒個關門掣,咁其實留個掣係度有咩意思呢?

一個月後我係倫敦揾到一個合心意既單位住,搬咗入去後,又發現冇人㩒𨋢,不過今次連我都冇得㩒,因為直情連個關門掣都冇。以前係香港就算唔趕時間,我都習慣㩒個關門掣,有時仲連㩒幾下,總之見到個門開住但又冇人要入黎就唔舒服。

有一日早上,同一個英國女同事閒談,佢話今朝遇到一個horrible person。我就問佢發生乜事,佢話入到公司部電梯,有個男人係咁㩒個關門掣,㩒到勁大聲,之後有另外一個同事想入黎都入唔到。呢位本土的英國同事繼續用高八度既聲調講:

「What's wrong with him?」

今次直情連個關門掣都冇。

佢話基本上冇人係會㩒個關門掣,如果咁趕時間就應該早啲出門。聽到呢到我慶幸既係冇同事見過我係咁㩒過關門掣。自此以後,每次入𨋢我都提醒自己唔好多手。有好幾次同同事入𨋢都忍唔住慣性咁伸手去㩒𨋢,好彩都及時被我制止,冇被同事發現其實我都係一個horrible person。

一直在倫敦生活,最後我都冇咗㩒𨋢門既習慣。入到電梯,就慣性呆企等到𨋢門自動關上。

最近回來香港兩個星期,回到自己既地方特別有親切感,隔離鄰社見到面都會打招呼。返咗香港幾日就覺得自己好快就融入返香港。有一日我約咗朋友見面,遲咗出門都有啲趕時間。我入到𨋢都係等佢自動關門,之後係下一層,有個大媽拖住個小男孩入黎,個大媽對住我微笑,我也回報一個微笑。之後佢幫個小男孩整理衣服,我也繼續呆企。過咗幾秒,個大媽望住我然後大聲話:

「痴線架,做乜唔㩒𨋢呀?」

然後佢即刻伸手㩒咗個關門掣兩下。我被突如其來的責罵嚇一嚇,更感到莫名其妙,心諗:有冇搞錯呀!有冇咁趕時間呀?

之後我回想初到倫敦的時候,我同大媽一樣,心裏也有責罵其他人唔㩒𨋢,而家反而見到有人係咁㩒𨋢就好奇怪。被大媽鬧完之後,我係香港每次搭𨋢都提醒自己一定要㩒𨋢門。

而家我終於認識到乜野係reverse cultural shock。

回想初到倫敦的時候,我同大媽一樣,心裏也有責罵其他人唔㩒𨋢……
(圖片由作者提供,本文為投稿,稿件可電郵至iwanttovoice@hk01.com;文章純屬作者意見,不代表香港01立場。)



原文連結



0 comments:

Post a Comment