2017-06-18

【立場新聞】人在中環 - CK:究竟唔鍾意啲乜? (1434)


九歲女孩子上America's got talent呢件事,香港人有好多迴響。唔少人對佢父母嘅選擇有點意見,坦白講,包括我。

我自己就唔覺得America's got talent 算係咩商業演出,甚至我覺得上一次半次呢亭show,唔算係咩大問題。但簽經理人公司,就幾可肯定係一個「商業活動」。而呢個商業決定,亦肯定係父母嘅決定多於個細路。

有人話,咁細個就喪train個小朋友,搞到佢冇晒童年啦!即時讓人聯想起Vanessa Mae嘅悲慘童年故事…然而細細個訓練有冇問題?老實講我覺得其實冇,as long as 個細路係真心enjoy。正如有朋友話,好多世界級嘅運動員,都係自細就俾人死train爛train的。為咗理想而作出嘅訓練,有時可以好熱血的,而這些「苦練」,甚至會成為長大後嘅美好回憶都未定。但娛樂事業同運動員嘅訓練,又是否係一個apple to apple嘅比較呢?身處於娛樂事業跟體育事業之中,所面對世人目光嘅性質,我相信係有明顯嘅分別的。

假如你嘅小朋友,係一個好似Celine咁天材橫溢嘅孩子,作為父母嘅其中一個重大選擇係,是否願意將孩子嘅童年,暴露於公眾目光之下。小妹妹有talent,這肯定毫無疑問。我哋先唔去小人之心,去咬定父母嘅動機係出於金錢或者虛榮心;但你是否願意為了讓她的talent得到世人認同,而要付出「將孩子嘅童年暴露於公眾目光下」這個代價?我可能守舊,但我就肯定唔願意。即使,孩子跟我說話佢有幾喜歡表演都好。

另,小妹妹唔係運動員。唱歌嘅生涯受年齡限制嘅程度相對少。佢嘅talent唔會到十幾歲之後就唔見咗,又或者要退役的。Timing is the problem,為甚麼唔可以等佢大一啲,成熟一啲先推佢出來?



原文連結



0 comments:

Post a Comment