2017-05-06

【聚言時報】銀行中女:紅十字會根本係自己攞來賤 (4028)

香港鬧血荒,前前後後都玩左好幾個月,但係問題根本係紅十字會自己玩嘢。以上次立法會選舉為準,深黃票源唔到兩成,當中又唔係全部都係高、膠、連三登嘅巴絲,根本喺社會嘅影響力好細。與其話係血荒係三登搞出來,不如睇清楚紅十字會有幾僵化。

首先,紅十字會嘅捐血目標係平均每日1,100包,一年就係401,500包。以成年男士可以每年捐五次血,成年女士可以每年捐四次,其實只要有8至10萬恒常捐血者,就唔會出現血荒。最近一次宣傳,講到全港得番四日存貨,其實每日仍然籌到九百幾包血。換言之,形成血荒嘅缺口,實際上只係每日百五包左右,一年就係55,000包。係咒罵人地屋企人,同三登巴絲開戰,紅十字會不如做以下動作。

1. 現時九間公眾捐血站之中,總部、西九龍、同中區三間係星期日休息,而閒日除左旺⻆站之外,都係晚上七點或之前就收工。對於「返工最大」嘅淺黃、淺藍而言,實際上就只有星期六同埋部份站嘅星期日先可以捐血。筆者嘅淺黃豬豬朋友,每次捐血都要等個幾鐘,仲經常等等下要去食飯、接仔、睇戲,等得一半就迫住要放棄。官僚心態嘅極致,就係連你班賤民無私奉獻,都要就佢嘅時間,「my way or the high way」。

2. 香港有16萬公務員,其中62,000係紀律部隊,更係有一定體力要求。如果紅十字會可以勸到所有紀律部隊每年每人捐一次血,已經超過現時嘅缺口。如果可以令到全體公務員每年每人捐兩次半血,更加係提供哂所有血源,根本可以不假外求。

3. 香港有12,000中國留學生。點解唔動員佢地捐血?只要佢地都捐足四次或五次嘅上限,已經係54,000包,基本上補足左現時缺口。而且如果俾中國留學生做到依樣野,班港獨分子就少左個藉口去歧視人地,反而可以促進融合。完全唔做,係唔係佢地嘅血矜貴過土生賤民?

當然,以上幾個方法,無可能單一招可以100%解決問題。但係處理危機,幾時都係依個方案補到20%,果個方案補到20%,加加埋埋就係答案。紅十字會依幾樣基本步驟都唔做,就急不及待咁同後生仔開戰,到底係懶,係蠢,定係突登挑起矛盾?

The post 紅十字會根本係自己攞來賤 appeared first on 聚言時報 Polymer.



原文連結



0 comments:

Post a Comment