2017-01-12

【聚言時報】凌:中國生產唔到原子筆頭? (1130)

李克強話中國生產唔到製造原子筆頭嘅「鋼材」,其實係條偽命題。請注意,好多人有所誤解,以為李克強係講緊筆頭粒珠,其實一直以來講緊嘅「筆頭」係指裝住粒珠個座。

現代原子筆於1938年註冊知識產權,並於兩年後開始大量生產,嗰陣時邊有精密數碼機床?所以「由於太精密外國唔出售」之說唔成立;再者,生產咗差唔多80年,而且仲要係全世界日日生產百幾萬支,點會仲係咩「高度」商業機密?既然如此,有咩值得遨功?其實只要考慮返中國嘅國情,就真相大白了。

原子筆頭根本唔係用鋼整,而係用黃銅(brass)製成。

咪以為銅好常見,其實佢算係種戰略資源。舉個例子,全世界嘅子彈都係用黃銅彈殼,唯獨中國子彈係用所謂嘅「覆銅彈殼」(copper-washed cartridge):彈殼用鋼製,外層再覆上一層薄薄嘅銅。子彈之所以一定要有銅,係因為銅嘅摩擦系數低,令子彈能夠順暢咁喺槍支內移動,加上銅嘅抗腐蝕性強,易於保存。中國早年試過生產全鋼彈殼,結果解放軍槍支頻頻出現卡彈及其他意外,搞咗一大輪先發展到宜家嘅覆銅彈殼。就算係咁,一般共識仍係外國嘅全黃銅製彈殼,優於中國嘅覆銅彈殼。

用黃銅製造筆頭(同彈殼),工藝簡單,全世界都係咁整,要仿傚自然唔係咩難題。難題係:中國鋼鐵產量嚴重過剩,但銅產匱乏,故此中共偏偏唔想用黃銅,而要用鋼嚟整原子筆頭。要令鋼達到黃銅嗰種抗腐性、耐磨度、同其他性能,工藝有幾複雜?睇篇報導就知,而呢個先係要用到嗰啲咩精密機床嘅地方。鋼材達到如此質素,當然唔止能夠用於原子筆頭,更具有軍事用途。因此,並唔係點整原子筆頭喺外國屬於機密,而係點「用鋼」整原子筆頭屬於機密。

黨媒大肆報導自己生產唔到原子筆頭,其實真正意圖唔係想透露中國鋼工業嘅真相,更唔係想講咩「睇吓我哋中國人幾醒,又解決到難題!」或「睇吓外國幾惡毒,連原子筆技術都唔畀我哋。」之類嘅八股;反而,佢係想掩飾中國一直以來嘅戰略痛處,故此刻意將「唔夠銅產」呢種改變唔到嘅先天弱點,轉移為睇起嚟可以改善(而且又可以用嚟宣傳)嘅「技術不足」。一句話:其實咩都冇改善到。

您會問:「冇嘢改善到?宜家咪識得點出產鋼製筆頭囉。」

我會答:「咁共產黨咪有多啲銅去整子彈射你囉,傻仔!」

P.S.查返wiki,原來粒珠一樣唔係用鋼整,而係用碳化鎢(tungsten carbide)製成,即係普遍用嚟整穿甲彈嘅原料。小小一支原子筆,原來咁具軍用價值。

The post 中國生產唔到原子筆頭? appeared first on 聚言時報 Polymer.



原文連結



0 comments:

Post a Comment