2016-04-14

【巴士的報】翠如爸爸股 一個大陷阱 (1037)

藝人黃翠如個爸爸黃永華新上市那隻建築股聯旺(08217), 呢隻股以全配售上市,周二掛牌炒高14倍,周三繼續狂升,最高升 2.5倍至14元,較配售價0.26元,高52.8倍! 周三收11.28元,仍升1.8倍,仍然較配售價高42.4倍! 翠如BB爸爸黃永華持有4.68億股,佔股37.5%, 若以以聯旺昨日收市價11.28元計,持股市值超過52.8億港 元,這只是帳面財富,但娛樂版已當正翠如BB係富家女啦。

最好笑個笑位係翠如爸爸隻股市值141億,翠如 BB自己打工那一間 TVB(511)市值只有123億,一間創業版公司市大過TVB ,真係「信一成雙目失明」。一隻做土木工程的創業板股票,至20 15年3月底年度盈利1808萬元,炒到779倍市盈率,借中國 50年代搞大躍進的名言去形容:「人有多大膽,地有多大產」。 呢啲全配售股份圍晒飛,自己友買哂,並無街貨由外人持有, 真係要升幾多可以升幾多,市價幾多你真係唔好信呀。

聯旺(08217)上市三日以來的走勢圖
聯旺(08217)上市三日以來的走勢圖

有人可能話,我無咁蠢而家去買。但我怕佢有日急插8成,跌到2. 3元時,散戶會走去撈,博即日鮮反彈,你那時會忘記咗,2.3元 呢個價仍然係上市價0.26元的9倍,而0.26元的上市價, 其實已經係18.3倍的高市盈率,大戶派晒貨俾入場撈底的散戶, 你接咗貨後佢彈都唔彈,繼續直插。近排好多配售狂升股, 都係等跌落來得番高位一兩成時,引來一班撈底客入場, 就在呢一浸引到街客接貨殺人啦。翠如爸爸股惹來大量免費宣傳, 更易引人落叠。結論係呢啲股睇吓好啦,唔好掂呀。



原文連結



1 comment:

  1. 創業版居然批准蚊型建築公司上市, 違反創業版成立的宗旨, 必須嚴厲譴責.

Post a Comment