2016-02-29

【熱血時報】賽德克:支持梁天琦,廢青與有榮焉 (3778)



雖然成日恥笑左膠泛民「今日係乜乜物物最XX的一天」,但我都要講,自年初一起,短短呢二十一日,我覺得真係「香港年輕人見到曙光嘅二十一日」。幫梁天琦助選以嚟,好多次被唔同嘅情景感動,前不見古人,活喺香港呢廿七年嚟,我未見過年青人嘅聲音咁受重視。

先係富士康日以繼夜夜以繼日又黐又搣,呢樣工作本身唔係話好多人,正正係宣傳品被選管會封殺之後,一石激起千重浪,每晚一車又一車,帶嚟一班又一班幫手搣貼紙嘅奴工。無可否認嘅係,我地名副其實係一班廢青,而一班廢青,對於呢嘅咁嫌惡性嘅工作,係極之抗拒架。先唔講搣到手指頭都痛,最難頂嘅係嗰陣天拿水味,日索夜索,索到溫溫吞吞。奇怪嘅係每晚到十二三點嘅人先開始散,而散極,到四五點都會有二三十人繼續努力。而雖然我地叫「廢青」,但我地其實係要返工返學架,就算唔使做嘢都寧願喺屋企hea啦。講嚟講去廢青前廢青後,但唔講唔知,當中不乏專業人士,時薪高過富士康工人N咁多倍,真係貪得意圍威喂嚟玩手工?

再去到街站宣傳,我敢講,同其他候選人比起上嚟,梁天琦嘅街站同義工數目一定最多。再講多次,我地廢青嚟架,唔捱得,企多兩企就腳軟架啦。最緊要嘅係,八九十後大公子大小姐脾氣,唔被人鬧得架。但試問下每一個揸過咪派過傳單嘅義工,有邊個未試過當街當巷被人媽叉?換轉係平時,晨早開拖還擊,但竟然被人問候完老母,仲會笑笑口霎熟狗頭咁講句「多謝支持」,任插唔嬲喎。仲要假到出晒汁,派傳單嗰陣條腰彎過九十度,個頭都就樁落地咁款,連五斗米都唔會令我地折腰,但呢幾日反而個個都鞠躬盡瘁仆心仆命啊!

直至二二八全日拉票,我見到屬於年青人嘅群體,屬於年青人嘅活力。而呢份「年青人嘅活力」,包括嘅唔剩止係後生仔,而係支持新興時代嘅中年人老年人。當中有一對滿頭皆白嘅公公婆婆,睇落都六七十歲,住喺九西,但朝早八點已經出到去新東幫手拉票,一直企一直企,企到夜晚十點半先走,呢啲唔叫「年青」仲可以叫咩?而平日只會喺大學reg day出現嘅撼莊盛放,罕有咁喺大大小小各個街站出現。藍衫人喺站外面嘅拉票聲,嗌到入月台都仲聽到,點解呀?因為我地後生囉,有氣有力呀。係,的而且確,我知咁樣好嘈,甚至會嚇親好多街坊,好嘈好兀耳。至所以嗌得咁大聲,係想話畀香港人聽,呢啲係年青人嘅聲音,代表住年青人嘅活力,代表住我地要正正式式堂堂皇皇咁走入一向被「大人」操縱住嘅世界,攞返屬於我地嘅世界。

「廢青」呢個字,起名嘅嗰班,以為係侮辱緊新一代人。佢地總係要攞住嗰種「金錢至上」嘅心態,去批評唔想為錢幣做奴隸嘅後生仔。但愈用得耐,一班廢青反而愈鍾意呢個名,名字背後,真正諷刺嘅對象係一班賣弄資歷嘅老屎忽,見住你地心目中嘅繁榮都市,畀我地呢班「廢青」搞亂檔,都咪話唔爽。我地呢班廢青係咁以發下力,一個月都唔夠,就已經贏深耕細作多年嘅方國珊幾條街,嚇到泛民鼻哥窿都無肉啦。

呢個景象令我諗起聖經新約,耶穌出道以嚟,一直被班宗教領袖法利賽人視為滋事份子,有木匠唔做,一日到尾剩係識去旅行,靠住把口呃呃氹氹,呢道瞓下嗰道食下,仲要係咁挑戰權威,用香港今日嘅說法,咪就係廢青囉!但呢個廢青號召左成千上萬人跟佢搵食,搞到耶到撒冷暴動咁滯,最後你班道德領袖全部收晒皮呀。耶穌出身嘅城市「伯利恆」,亦係被好多人睇唔起嘅一個小鎮,但呢個咁廢嘅鎮,出左個宇宙偉人呀喂!

最後再講多次,我唔係剩係投畀「梁天琦」,而係投畀呢個時代嘅香港人。梁天琦我唔識,但佢代表嘅係新一代望改變嘅姿態。由二零零八年,黃毓民啱啱入立法會,掟擲蕉已經驚為天人萬方責難,到今時今日和理非非泛民主派都要衝出去佔領主席枱,就話畀我地知,時代要進步,唔可以停滯不前。而本土泛民,邊個進步邊個原地踏步,大家有目共睹。

兩點鐘睇住點票,楊岳橋攞十二萬票,周浩鼎十一萬,梁天琦都有五萬。係呀,梁天琦係輸左呀,但佢都係贏左喇。唔係輸打贏要,係輸贏都要呀。公係我贏,字係你輸囉。最後出嚟最少都有五萬票,呢個票數,嚟緊九月做票王都要啦。唔好忘記,楊岳橋攞咁多票,係集合左所有泛民嘅票源,到時九月再選,泛民拆咁多張多單,公民黨又會剩返幾多票呀?而楊天琦呢?今次投得六號嘅人,我肯肯定佢唔會再投泛民,咁即係話呢五萬票係鐵票嚟架啦!今次梁天琦係以一人之力挑緊兩大傳統陣營機呀?仲俾梁天琦攞到百份之二十嘅票,泛民要做過敗選檢討啦。

連廢青都可以翻天覆地,你班有為中青做緊乜?支持梁天琦,廢青與有榮焉。

二零一六年二月廿九日凌晨二時


原文連結



1 comment:

  1. 「廢青」翻天覆地? 不要當眾自瀆好了. 你們這班名副其實的廢青, 祇有空洞而離地的理想, 心態幼稚, 缺乏人生體驗, 一味盲目反對前人的努力, 自以為是, 毫不自省, 再這樣下去, 你們是會撞頭埋牆, 一事無成的.

Post a Comment