2015-11-25

【獨立媒體】Kate Leung:村民唔係咁諗之關於鉛水啟德泛民慘敗,從七月至今,一個記者的一點紀錄 (2221)

1. 啟德兩區係新區,本就龍爭虎鬥,再加泛民揭鉛水醜聞,建制更加唔輸得。選前已經漏風啟德北(啟晴)係建制社團緊張催票區,發埋功,到臨選應已鐵票在握。梁婉婷贏係可以想像,但個投票率over 50%且大比數贏,老實講我幾驚訝。絕對係有決心催票令泛民輸得徹徹底底,永不翻身。

2. 問題不在泛民打鉛水民生議題都贏唔到蛇齋餅粽。出乎意料,訪問過幾位再加自己觀察,村民真係唔係咁諗:鉛水直頭唔係投票考慮!一來建制後來居上,有錢免費驗水、事事跟足,但唔係重點。建制勁在成功令街坊感覺事同人好疏離,只諗解決問題就唔在意邊個要負責,再淡化件事件。

呢兩日好多人鬧港豬為左蛇齋餅粽,寧願飲鉛水,其實呢,佢地根本唔知派蛇齋餅粽既人同鉛水有關係。接觸過既街坊,似乎都覺得鉛水係一場「意外」,係因為「政府」(一個含糊的概念,亦唔會理解承建商同班否決特權法既議員關事,更別提候選人同d議員既政治連繫)有「甩漏」。開頭係擔心,但意外出錯邊個想?人誰無過?有應變措施肯補鑊就即係無事啦,何須咄咄逼人?

鉛水風波,泛民似乎敗在無好好定調,風一轉,令原本公眾健康密切相關既議題,變成一個無人在意既小錯漏。

3. 當選的梁婉婷一如其他出色建制選手,由居民入伙前到選舉都熱心到痴線,成日打電話俾街坊,又派野又優惠又搞活動,攻勢係好受落。除左籠絡,更加係滲緊個印象俾佢地:梁一直都做好多實事,反觀泛民就淨係鉛水先咁大聲(雖然明明地區野唔係無做)。根據街坊講法,搞鉛水可能更顯得泛民無用,甚至係抽水搞事。

4 講開,有樣野想講好耐。 開頭爆出鉛水單野,開左d會員大會,民主黨真係hold會hold到我好鬼憫。好老實講,我感覺就係不斷製造恐懼,要弱小既街坊投靠英雄一般等你打救。咁樣可能係需要既策略,令街坊注意件事同支持你,但如果長期係咁,街坊就同鉛水背後既問題更加疏離,更加唔清楚會出事係因為有班當公眾健康係垃圾既官員同唔知幾多利益關係,更加唔理解自己應有既權利同力量。將街坊置於被動、弱勢位置,等於只鬥邊個「幫」你響鉛水事件上「爭取」得多d(which響資源上一定輸俾建制),更幫政府、建制將事件去政治化,造就第2點的結果。

之後的食水苦主大聯盟我無太多跟進,唔知道響擺街站收簽名、叫人去遊行之外,有幾多組織街坊、讓小市民充權既嘗試,如果有,都似乎唔成功。輸左既民協李庭豐係值得欣賞既候選人,亦好有帶動社區參與既理念,實行時未足理想,實在可惜。往後有咩事件,可以如何更有力定調事件,如何令居民消化資訊,如何保持話題熾熱,如何鼓勵、組織他們親自參與抗爭,如何在參與過程之中認識自生活與政治的關係,認清邊個係人邊個係鬼?

5. 呢區的確極多操口音年輕媽媽,但無法確定新唔新移民同結果既關係,我上面訪問到的人都係講純正廣東話。基層、多小朋友、對搬入新區惶恐但感恩(所以亦唔會特別blame政府),呢d係我比較肯定既觀察。

先唔講有無更黑暗既手段,建制要街坊投票,蛇齋餅粽呃呃氹氹,一定有,但真心鍾意同支持佢既我諗一d都唔少。或許最初籠絡的是肚皮,慢慢卻因而收買了心。我觀察係,梁婉婷同好多街坊遠唔只係利益關係,成日見到佢同區內小朋友玩、同師奶吹水,老一輩經過就同佢問好,態度當佢女咁。呢個同區內年輕家庭多同埋新搬入區也許有關。唔係你送得多野俾我我投你有著數,係因為我相信你對我好,我鍾意同你一齊,有咩事我知可以靠你,有活動我好開心同你同樂。短短兩年幾,佢成功建立既,係情感關係。



原文連結



2 comments:

  1. 這些港豬,就算飲鉛水飲恐也是活該

  2. 飲死是活該

Post a Comment