2015-03-11

【謎米香港】蔣薇:「唔係你走唔走私,而係你啲同胞走私」 (1582)


聽到呢句說話,我好震撼。

假如你係一個大陸人,嚟香港影相食飯睇景點,突然一班蒙面人圍住你,對你的行李拳打腳踢,再要求你打開行李檢查,發覺無特別,最後同你講,依家唔係你有問題,係你呢個民族有問題,所以你需要接受呢種對待。

或者大陸人係香港人心目中已經有負面形象,我舉另一個例子。

你同屋企人去法國旅行,突然一班人走出黎圍住你,原因係因為中國人負面形象,你需要為你嘅同胞贖罪,圍完你,搞完你,好喇,你走啦,你仲要感謝原住民皇恩浩蕩。

解釋你唔係中國人,你係香港人,兩者之間有唔同有分別?

咁又有人區分過水貨客同遊客之間嘅分別嗎?

無,原因好簡單,點錯相,又唔想認衰仔,咪搵野去挑剔,搵毛病去針對,片中一個男仔圍住行李睇左好耐,我有理由估計佢係想係行李中搵出水貨去證明自己行動合理,可惜佢最後都無查獲過任何證據。先唔討論佢有咩公權力去搜查途人私人物品,但當你反水貨客,點錯一個遊客相嘅時候,係唔係應該要道歉呢?

無,佢地無道歉,唔單止無道歉,最後祭出最終理由,「唔係你走唔走私,而係你啲同胞走私」,同胞?何謂同胞?大家拎住護照相同,國藉相同就係同胞嗎?

無,我可以大膽講,「同胞」一詞,我相信片中圍堵人群裡面都有唔同定義。

片中女人,佢認為香港、中國係個體,兩者無分別。
片中蒙面男人,佢認為香港、中國係兩個地方,唔好認親認戚。

何謂同胞,大家都自圓其說,你有一套界定準則,當你遇到印尼排華,BNO可唔可以救到你?如果蒙面男子被十數個印尼排華份子指責時,聽到一句「唔係你係唔係好人,而係你啲同胞唔係好人」,會唔會有種似曾相識嘅感覺?

而佢?又會唔會為自己的「原罪」去接受懲罰呢?

有人話,唔好因為手法去遺忘原意,叫人諗諗點解會有班人走出嚟咁做。

我會覺得,好心都可以做錯事,無人質疑佢地原意,但手法上是否洽當是否成熟先係問題,一個成熟嘅人可以將好事處理得好好,唔成熟嘅人就用好事做擋箭牌。發生左就發生左,柒左就柒左,承認自己處理得唔好,改善處理手法先可以係下次行動中贏得更多支持;相反,只會變成一個小圈子義和團活動。

當世界走向一個不分人種、膚色、種類、宗教、性取向嘅社會時,竟然有人走回連坐法,而呢班人竟然話自己想改變香港,治國之前,請先修身,好好認清自己做法上嘅錯誤。

如何去評價一個人,應該從佢地嘅行為去評價,而唔係種族。

每個人都係個體,唔應該為其他人嘅行為負責,所以我地每人都有自己嘅名。

原文刊於蔣薇FACEBOOK



原文連結



0 comments:

Post a Comment